Saturday, March 5, 2016

തൊട്ടാൽ വെള്ളത്തിലെന്ന പോലെ
വിരലുകൾ താണുപോന്നതായ
നിലത്ത്
അമർന്ന്‌ കിടന്നാൽ അറിയാം
ഒറ്റയ്ക്കൊരു കടൽ നീന്തുന്നത്‌.
ഞാൻ കത്രികയെടുത്ത്‌ നിലം മുറിയ്‌ക്കയാണ്‌.
ഇരുട്ടിൽ കടൽ കുടഞ്ഞ്‌
അലകളെ പറിച്ചെടുക്കാൻ.

ഇതളുകളുടെ വായ തുറന്നാല്‍ കരച്ചില്‍ കേള്‍ക്കാം
കരച്ചിലിൽ ആണ്ടു ചെന്നാൽ
മുങ്ങു പോകുന്ന കാവ്‌ കാണാം.
ഇനി കാവ്‌ മുറിച്ച്‌ അകത്ത്‌ കേറണം.
അവിടുത്തെ കല്ലുകളിൽ നിന്ന്‌
ഇനിയും പുറത്ത്‌ വരണമെന്ന്‌
ദൈവത്തിന്‌ അതികഠിനമായ ദേഷ്യം വന്നു,
മൂപ്പര്‍ ഒരു ബീഡി വലിക്കാൻ പോയ നേരത്താണ്
ആ പെണ്ണുങ്ങള്‍
കാവിലെ പുല്ലെല്ലാം അരിഞ്ഞത്.

പുക പാട്ടുകള്‍ വരച്ചുകൊണ്ടിരുന്നു.

കുരുമുളകു വള്ളികളും
പാട്ടിന്‍റെ വള്ളികളും
കെട്ടുപിണഞ്ഞു കിടന്നു

അതിലേയ്ക്ക്
പടർന്ന്‌ കയറാന്‍
അവര്‍ ഉറപ്പിക്കുന്നു

പകച്ച ഉച്ചകളിൽ നിന്ന്‍
ഒന്നാമാത്തവൾ പാവാട തെറുത്ത്‌ കൊണ്ടോടുകയാണ്',
വള്ളികളില്‍ വേഗം അവള്‍ ലയിച്ചു പോയി
രണ്ടാമത്തവൾക്ക്‌ അവളുടെ തുമ്പ്‌ പിടിക്കാനേ ആയുള്ളൂ.
മൂന്നാമത്തവൾക്ക് രണ്ടാമത്തവളിലൂടെ പടരനായി.

അവസാനത്തവൾ പറന്നില്ല, ഒരിക്കലും.

കടൽ സ്വയം ബോധ്യമാവും വരെ
നീന്തികൊണ്ടിരുന്നത്‌ പോലെ
അവൾ കത്രിക വച്ചു കാവ് പിന്നെയും മുറിച്ചുകൊണ്ടിരുന്നു.

No comments:

Post a Comment