Monday, September 14, 2015

ചെവിക്ക് പിടിച്ച് കുളിക്കാനായി കൊണ്ടിരുത്തും,
ഉടൽ ഭിന്നിച്ചു നിൽക്കും ആ നേരം.
സമയത്തിന്റെ കൈപ്പത്തികൾ
മുതുകിൽ കൊഴമ്പ് പുരട്ടി പുരട്ടി നില്ക്കും, അതേ മട്ടിൽ.
തലയിൽ തിരിഞ്ഞു കിടക്കുന്ന
ഊടുവഴികളിൽ
ടയറൂരി
അതുമോടിച്ച്
ബെല്ലുമില്ലാബ്രേക്കുമില്ലാ
പുഴയിലേയ്ക്ക് പാഞ്ഞു പതിക്കും
സൈക്കിൾകുട്ടിയെ പോലെ
മുഷ്ക്ക് മണത്തിന്റെ
ഉള്ളറകളിൽ
ഷവറിലെ
പുഴ കുതിക്കും.
അപ്പോൾ ശർർർർ ന്ന് മൂത്രമൊഴിക്കാൻ തോന്നും.
(ഞാനങ്ങനെയാണ്‌,
ചെറുപ്പത്തിൽ അടുക്കള ചായിപ്പിന്റെ ഓവ്വ് വശത്ത് ഒളിച്ചിരിക്കും,
ഓവിലൂടെ മഞ്ഞ വഴിയായി പിന്നയൊരു മഞ്ഞ ചേരയായി മൂത്രം പുറത്ത് ചാടും,
വഴിയിൽ വച്ച് ആ ചേരയെ കണ്ട് ഞാൻ പത്ത് വീടുകളെ ഒറ്റ ചാട്ടത്തിൽ കടന്നോടും,
ചായിപ്പിന്റെ മൂലയ്ക്കിലിരിക്കുന്ന എനിക്ക് ചിരി വരും)
എന്നങ്ങനിരിക്കെ
20 വർഷമായി
കുളിക്കുമ്പോൾ
കുളിച്ചുകൊണ്ട് മൂത്രമൊഴിക്കുമ്പോൾ
ഞാൻ ഈ ചായിപ്പിൽ ഒളിച്ചിരുന്നു ചിരിക്കയാണ്‌.
എന്റെ മൂത്രം ഒഴുകിയ വരിയിൽ
മഞ്ഞ റോസാച്ചെടികൾ മുളച്ചതായി
ഇപ്പോളവൻ പറയുന്നു,
ഭൂമിയുടെ മാളം പോലെ
വായ തുറന്ന കക്കൂസിന്‌ ചുറ്റുമിരുന്ന്
ഒന്നൊന്നായി
ഞാനിറുത്തെടുപ്പിക്കും.
മുപ്പത്തിമൂന്നെന്ന
എണ്ണമെത്തുമ്പോൾ
ഓവ്വ് വഴി ഞാൻ പുറത്തെത്തും,
തണുപ്പിനുള്ളിൽ ഒരു കുളിമുറി മുങ്ങിത്താഴും.

No comments:

Post a Comment