പല നിറ കട്ടകൾ വച്ച്
കുഞ്ഞ് വീടുണ്ടാക്കുന്നു.

ഞാൻ ഓടി വന്ന്
വീടിന് പുകക്കുഴൽ വച്ചു കൊടുത്തു.

പുക വന്നു തുടങ്ങി.

അകത്തെന്തോ ഉണ്ടാക്കുന്നുണ്ട്.

ഞാനപ്പോൾ
രണ്ടു മലകൾക്കിടയിൽ നിന്ന്
പൊങ്ങി വരുന്ന
സൂര്യനെ വേണമെന്ന് വാശി പിടിച്ചു.

കിണറും തൊട്ടിയും വേണം.

പറന്ന് പോകുന്ന കാക്കകളും.

കുട്ടിക്കെന്നാൽ പ്ലേ യേരിയയും കാർ പോർച്ചുമാണ് വേണ്ടത്.

ഞാനവിടെ ഓലമടലുകൾ വലിച്ച് വടക്കോറത്തിടുന്ന അമ്മയെ കണ്ടു.

പാവലിന് പന്തൽ കെട്ടുന്നത് കണ്ടു.

കാവിലെ ഇലകളിൽ നിന്ന്
മുൻപവിടുണ്ടാർന്ന
അണ്ണാൻക്കുഞ്ഞുങ്ങൾ
പൊഴിയുന്നത് കണ്ടു.

എന്നെ കൊത്തിക്കൊണ്ടുപോയ
കിളികളെ കണ്ടു.

തിരിച്ചു കൊണ്ടാക്കിയതും കണ്ടു.

ശരിയാണ്,

ചില സമയങ്ങളിൽ

ബിൽഡിങ്ങ് ബ്ലോക്ക്സിന് വേണ്ടി
കുഞ്ഞിനോട്
ഞാൻ തല്ലുകൂടാറുണ്ട്.