എന്നിൽ

രാത്രി

ബാധിച്ചിരിക്കുന്നു.

കിണറ്റില്‍ നിന്നാരോ

വെള്ളം കോരി കുളിക്കുന്ന

ഒച്ചയില്‍

ഞാന്‍ ഭാഗമാകുന്നു.

ദേഹത്തിനിപ്പോൾ

ചിവീടുകളുടെ ശബ്ദം.

പുല്‍പൊന്തകൾ,

ഇടവഴികൾ,

തോടുകള്‍

വരമ്പുകള്‍

കവലകള്‍

എല്ലാം

പതിയിരിക്കുന്നു.

ഇരുട്ടിന്റെ

പൊത്തുകള്‍

തുറന്നു

എന്നില്‍

നിന്ന്‍

പാമ്പുകള്‍.

അരിച്ചരിച്ച് കയറി

ഞാന്‍

പൂര്‍ണ്ണമായും

ഇരുട്ടായി.

എന്റെ ശരീരം

ആരോ

പലകയിൽ കിടത്തിയിരിക്കുന്നു.

ആ ചക്രം കറക്കിയാൽ

പകലാവും.

എന്നെയൊന്ന് തിരിച്ചിടൂ.

അങ്ങനെ

മുൻപും

ചിലതൊക്കെയൊഴിപ്പിച്ചുണ്ടല്ലോ.

ഒരു സിറിഞ്ച് നിറച്ചും

വെളിച്ചം കുത്തിവയ്ക്കൂ.

കണ്ണു തുറന്നാൽ
കാണാൻ

ഇതുവരെ

കണ്ടിട്ടില്ലാത്ത

ഒരു പകൽ,

രണ്ടു മലകള്‍ക്കിടയിൽ

നിന്ന്‍.

വെളിച്ചത്തിന്റെ

കോട്ടിട്ട്

ഒരു കൂണ്‍

വിളിച്ചുണര്‍ത്തിയ

പെന്‍സിൽ ചിത്രത്തിൽ നിന്ന്

ഇറങ്ങി വന്നിട്ടില്ലിപ്പോഴും.